Coca-Cola og fleiri bjóða upp á HM í Hljómskálagarðinum og Ingólfstorgi

Coca-Cola og fleiri bjóða upp á HM í Hljómskálagarðinum og Ingólfstorgi
17. maí 2018
Útsendingar frá HM í knattspyrnu munu fara fram í Hljómskálagarðinum og á Ingólfstorgi í sumar. Leikir Íslands verða sýndir í Hljómskálagarðinum en allir leikir mótsins á Ingólfstorgi. 
 
Hljómskálagarðurinn og Ingólfstorg verða því hin opinberu HM torg í sumar. Þetta var meðal þess sem fram kom á blaðamannafundi í Hljómskálanum í dag þar sem KSÍ og bakhjarlar þeirra ásamt Reykjavíkurborg kynntu áformin. Þá mun RÚV verða með útsendingar frá HM torgi og með umfangsmikla aðstöðu á staðnum.
Einstök stemning myndaðist á Arnarhóli fyrir tveimur árum þegar strákarnir kepptu á Evrópumótinu í knattspyrnu en til þess að geta tekið á móti þessum fjölda fólks var talið heppilegra að vera í Hljómskálagarðinum með tilliti til stærðar og umhverfis, aðkomu og aðgengismála. Á meðfylgjandi mynd má sjá hvernig skipulagi verður háttað í garðinum á meðan útsendingum stendur en þar er m.a. gert ráð fyrir leiktækjum fyrir börn og veitingaaðstöðu.
Bakhjarlar Knattspyrnusambandsins eru N1, Advania, Landsbankinn, Coca-Cola, Vodafone og Icelandair
Leikir Íslands verða gegn Argentínu í Moskvu þann 16. júní, gegn Nígeríu í Volgograd 22. júní og Króatíu í Rostov 26. júní. 
 
Fari svo að Ísland komist upp úr riðlinum verða þeir leikir jafnframt sýndir í Hljómskálagarðinum.
Guðni Bergsson, formaður KSÍ
„Knattspyrnuhátíðin í miðborginni heldur áfram þetta sumarið og nú tekur HM-torgið við af EM-torgum síðustu ára.  Það er auðvitað mikið gleðiefni að við séum í þeirri stöðu á hverju ári að bjóða til annarrar eins knattspyrnuveislu.  Samstarf KSÍ, Reykjavíkurborgar og bakhjarla KSÍ hefur verið öflugt og reynsla síðustu ára mun gera okkur kleift að gera enn betur í sumar. „
Dagur B. Eggertsson, Borgarstjóri
„Reykjavíkurborg býður alla velkomna að fylgjast með leikjunum og upplifa einstaka stemningu í fallegu umhverfi og góðri aðstöðu. HM er risaviðburður og við erum stolt af því að geta boðið öllum landsmönnum jafnt sem erlendum gestum upp á þennan möguleika.“