Búist við þriðjungsaukningu í sölu á páskabjór

Búist við þriðjungsaukningu í sölu á páskabjór
24. mars 2014

  • Páskabjór nú þegar uppseldur hjá Vífilfelli
  • Framleiðsla á nýrri sendingu hefst í dag til að mæta eftirspurn
  • Áætluð söluaukning milli 2013 og 2014 er 32%
  • Áttföldun frá árinu 2009
Landsmenn eru sólgnari í páskabjór í ár en innlendir framleiðendur bjuggust við og hefur Vífilfell þurft að framleiða meira magn af Víking páskabjór til að bregðast við eftirspurninni. Allur páskabjórinn sem áætlað var að framleiða fyrir páskahátíðina er þegar kominn í verslanir, þremur vikum fyrir páska, og því uppseldur hjá framleiðanda. Bruggmeistarar Vífilfells á Akureyri hafa þegar hafist handa við að framleiða aukamagn til að eiga ef bjórinn klárast í vínbúðum fyrir páska.


Uppfærðar áætlanir Vífilfells gera ráð fyrir að salan á Víking páskabjór verði um þriðjungi meiri en í fyrra. Sala á páskabjór hefur aukist jafnt og þétt síðustu árin. Hún náði hámarki fyrir hrun en dalaði svo nokkuð áður hún óx síðan á ný eftir því sem leið frá hruni. Í ár verður framleiðslan áttfalt meiri en hún var árið 2009.

Árstíðabundin bjórframleiðsla hefur notið vaxandi vinsælda hér á landi og sést það ekki síst í mikilli sölu á jólabjór undanfarin ár. Landsmenn virðast kunna að meta óhefðbundnara öl sem aðeins er fáanlegt í takmarkaðan tíma og bjórmenningin um páskana stefnir nú í að gefa jólunum lítið eftir.